Sanannen ɗan jarida da mai wasan kwaikwayo, Alhaji Ali Rabi’u Ali, wanda aka fi sani da Daddy, ya zama Shugaban Gudanarwa na tashar Dalla Dalla TV a Kano.
Ali Daddy ya yi fice a fannin jarida da talabijin a Kano, inda ya yi aiki a gidajen rediyo da TV da dama, ciki har da Rahama Radio/TV, Ammasco Radio, da Matashiya TV tun daga shekarar 2014 zuwa 2017. Duk da kasancewarsa ɗan wasan kwaikwayo, ya shahara wajen kiyaye addini da al’adun Hausawa.
Tashar Dalla Dalla TV, mallakin ƙwararren ɗan jarida Abubakar Adamu Rano, ta zaɓi Ali Daddy ne don jagorantar gidan talabijin, saboda gogewarsa a fannin TV da jajircewarsa a aikinsa.
Ali Rabi’u Ali ya fara aikin shugabancin ne yau, Alhamis 1/1/2026, bayan mika masa ragamar kama aiki.